قصه حب الاخوات
👩👦👦 قصة حب الأخوات
سن ٦-١٠
في بيت صغير جنب البحر كان ساكن أسرة صغيرة وبسيطة
كان عندهم ولدين أحمد ومعاذ, وكمان بنوته اسمها أميرة
- أميرة دايمًا كانت هادية وبتحب تلعب مع عرايسها الحلوين
أما أحمد ومعاذ كانوا بيحبوا يلعبوا مع أصحابهم التانيين
- أميرة في يوم كانت عاوزة تخرج تلعب مع اخواتها وأصحابهم
ووقتها راحت طلبت من إخواتها إنها تخرج معاهم وتشاركهم
- ولما أصحابهم شافوا أميرة, وقتها رفضوا انها تلعب معاهم
وقالولها تمشي لأنها مش صاحبتهم، ومش عاوزينها تلعب وياهم
- أحمد اتضايق ومكانش مبسوط أبدًا من اللي أصحابهم عملوه
وكان هيمشي ومعاه معاذ ولكن أصحاب معاذ مرضيوش يسيبوه
- وكمان معاذ كان عاوز يلعب ورفض يروح البيت مع أحمد وأميرة
ولما وصلوا البيت من غير معاذ, كان واضح على باباهم الحيرة
- وسِمع باباهم منهم القصة واستنى لما معاذ روح البيت ونده عليه
وقاله انه محتاج يفهم حصل إيه وهو ساب اخواته لوحدهم ليه؟
- ولما حكاله القصة, باباه أخده في حضنه وقاله إنه للأسف غلطان
وإن لو حد ضايق اخواتك, لازم تاخد موقف منه وتعاتبه كمان
- لإن اخواتك أغلى حاجة في حياتك, ولازم تحافظوا دايمًا على بعض
والمفروض إنك تهتم بزعل اخواتك, ومتدخلش ما بينكم أي حد
-معاذ فِهم نصيحة باباه ووعده المره الجاية هياخد باله
ومن بعدها بقى هو أكتر واحد بيدافع عن اخواته
