قصه البطانيه الصفراء

قصة البطانية الصفراء
#سن٦_١٢

كان في بيت كبير عايشة فيه هديل مع عيلتها الجميلة 
هديل كانت بنوتة مؤدبة وابتسامتها دايمًا لطيفة

هديل كان عندها اخوات بنات وكانت بتحبهم جدًا 
كلهم كل يوم بيقعدوا يلعبوا مع بعض وقت حلو دايمًا

هديل كانت أهم حاجة عندها حاجتها اللي بتحبها 
مبتحبش حد يستخدمها أبدًا ولا ييجي جنبها

ومن ضمن الحاجات دي كان عندها بطانية صفراء ناعمة 
كانت بتحب تتغطى بيها في كل مكان وشكلها حلوة

بتاخدها معايا دايمًا لما تسافر عشان تتغطى بيها 
البطانية دي ماما جابتهالها وهي كانت متعودة عليها

وفي يوم كانوا كلهم مسافرين يقضوا كام يوم عند جدتهم 
هديل أخدت البطانية معاها وركبت بيها عربيتهم

ولما راحوا عند جدتها قضوا وقت لطيف جدًا بيلعبوا 
وشافوا حاجات جديدة وعلى جيران جدتهم اتعرفوا

وفي يوم كانت هديل بتلعب مع بنت الجيران ومبسوطة 
والبنوتة شافت البطانية بتاعت هديل على الكرسي محطوطة

البنت قالت لهديل إن البطانية شكلها جميل جدًا 
هديل قالتلها إنها بتحبها ومش بتخلي حد يستخدمها أبدًا

وبعد شوية، هديل واخواتها وبنت الجيران كانوا كلهم مبسوطين 
بيلعبوا مع بعض ومقضيين وقت كبير مع بعض مندمجين

وفجأة البنت صاحبتهم خبطت كوباية العصير ڠصب عنها 
وبسرعة الكوباية وقعت على والبطانية كانت جنبها

هديل قامت بسرعة تشيل البطانية وكانت زعلانة جدًا عليها 
واخوات هديل كانوا عارفين اللي هديل هتقولوا ليها

كانوا عارفين ان هديل هتزعل من البنت عشان بطانيتها 
ولكن هديل وقفت ساكتة والبنت بسرعة اعتذرتلها

هديل قالتلها إنه محصلش حاجة وإنها مكانش قصدها 
اخوات هديل كانوا مستغربين وواقفين باصين لها

ولما مشيت البنت اخواتها سألوها إزاي مزعلتيش من تصرفها 
قالتلهم إن البنت لطيفة وهي معملتش كده بقصد منها

وكمان البنوتة اعتذرتلها ومكانش في حاجة في إيدها تعملها 
أه هديل بتحب البطانية، بس ده مش سبب عشان تضايقها

وبعدها راحت هديل وطلبت من مامتها تنضف لها البطانية 
وماما لما سمعت اللي حصل معاها كانت سعيدة وفخورة

وكانت مبسوطة من رد فعل هديل مع صاحبتها وهدوءها 
وإنها فكرت قبل ما تعمل أي تصرف ممكن يضايقها