حدوته ورطه تولا
حدوتة ورطة تولا
#سن٦_١٢
#سن٣_٦
كان في بنوتة اسمها تولا، كانت ساكنة في بيت كبير مع عيلتها
تولا كان عندها لعب كتير، وبتحب تلعب بيهم في أوضتها
كانت تولا كل يوم الصبح تحب تاكل حلويات كتير
ولما تروح مدرستها تجيب بمصروفها شوكولاتة وعصير
ولكن بسبب الحلويات الكتيرة، تولا بطنها في يوم وجعتها
وراحت للدكتور بعد المدرسة، وطلب منها تقلل حلوياتها
تولا كانت متضايقة وزعلانة، لإنها بتحب الحلويات جدًا
ولكن مامتها قالتلها إننا نقدر نعمل أي حاجة عاوزينها دايمًا
وطالما وصلنا لمرحلة إننا بنتعب، لازم صحتنا تبقى أولوية
وقالتلها إنها محتاجة تتعلم تاخد بالها من نفسها وإن عليها مسؤولية
تولا سألت ماما ازاي ممكن تبطل تاكل حاجة هي بتحبها
ماما قالتلها إنها مش هتبطل، ولكن هتاكل كمية قليلة منها
وفعلًا بدأت ماما وتولا يتفقوا على الحاجات اللي هتاكلها
وكل يوم الصبح تولا بتختار مع ماما هتاكل إيه من حلوياتها
وفي يوم تولا رجعت من المدرسة وكانت قاعدة بتلعب في أوضتها
واليوم ده كانت خلاص أكلت كل الحلويات اللي مسموح بيها
ولكن تولا كان نفسها تاكل شوكولاتة زي ما كانت متعودة
حاولت تشغل نفسها باللعب، ولكن دماغها مشغولة بالفكرة
لحد ما مقدرتش تقاوم، وراحت جابت برطمان الشوكولاتة
وأخدت معلقة، وقعدت تاكل منه كمية كبيرة في الأوضة
ورجعت البرطمان من غير ما حد من البيت كله يشوفها
وبقت تولا يومها مبسوطة جدًا، وقضت باقي اليوم بتلعب بلعبها
تاني يوم بعد ما رجعت برضه من المدرسة جاتلها الفكرة
وافتكرت قد ايه كانت مبسوطة امبارح لما أكلت الشوكولاتة
راحت تاني وجابت البرطمان، وكررت تاني نفس غلطتها
ويوم ورا يوم بتعمل نفس الحاجة، ومحدش بيشوفها
لحد ما في يوم أكلت شوكولاتة كتير أكتر من عادتها
ووجعت بطنها جدًا وبسرعة جريت على مامتها
أول ما مامتها شافتها قلقت عليها، وكان على وشها شوكولاتة
ولما بدأت تحكي اللي حصل، ماما فهمت كل الحكاية
وراحت بيها عند الدكتور، والمرة دي كانت تعبانة أكتر بكتير
والدكتور قالها إنه حذرها قبل كده ولكنها عملت غلط كبير
وبعد ما بقت تولا كويسة، ماما عاتبتها لإنها مكانتش قد المسؤولية
وكذبت عليها مع إن ماما اتفقت معاها تخلي إرادتها قوية
وقالتلها إنها عملت أكتر من غلطة، وبسببهم أذت نفسها
وخسړت ثقة ماما فيها لإنها كررت الغلطة ومكانتش قد وعدها
تولا اعتذرت لماما بعد ما عرفت قد إيه هي كانت غلطانة
ووعدتها متعملش كده تاني، وإنها هتكون قد المسؤولية
