رواية بنت الدوار الحلقة الثالثة 3 حصريه وجديده
رواية بنت الدوار الحلقة الثالثة 3 حصريه وجديده
نضت رحت توضيت صليت ودعيت ورقدت شويا ل غسلت ووجدت روحي واش من توجاد لبست ساجدتي حتى قرعة ديودورو ماعنديش كيف لبنات حتى صندالة ولا باسكات ماعنديش برك بالغين كيما نقولو درت خماري نغطي هديك الديسة تع شعري وقعدت ناكل فهداك الخبز وحدو لحقت 7ونص رفدت كرطابي وخرجت نشوف كل صاحبات رايحين مع بعض والحطة والروايح يفحفهو واللبسة ديك هي وزيد كنت نقرا قانون يعني شفتو صحاب الدروا كيفاش دايريين اللوطو ديك هي والحطة ولي يجيبها باباها وليت نشوف في روحي انسان غير مرئي وحتى فالقراية يديرو تمييز واش جاب بنت فلان لوحدة بوها مش معروف حتى اسمو لحقت نقرا دخلت جات قعدت حدايا وحدة اسمها نور تعرفت عليا وتبان ناس ميسورين الحال من لبستها ومن اكسسواراتها جبدت ريحة دارت وانا حاطة راسي دارتلي منها قټلها صحيتي ختي جبدت تاني جايبة وحد الحية منفوخة فالوسط ومن ومن عندها وذنين قاټلي مافطرتش الصباح ماما دارتلي كرواصون قاټلي كوليهم عرفت اسمو كرواصون جبدت تاني مدتلي قاټلي كولي معايا قټلها صحيتي قاټلي والله تاكلي قټلها نحشم ناكل قدام الناس قاټلي شكون راهو يشوف فيك كولي ماتخميش فالناس قعدت ناكل حاجة اول مرة ناكلها....
وحشمانة حسيت قاع راهم يشوفو فيا ماقدرتش كليت شويا برك قاټلي دسي لخر في كرطابك من بعد تاكليها دسيتها قعدنا شويا دخل البروف قعد يتعرف علينا ومدلنا البحوث سمعته يقول ليكسبوزي ماعرفت شاه حتى شرحتلي نور قاټلي انا معاودة العام بديت نفهم شويا قالنا كل 3يديرو مع بعض قاټلي نخدم انا وياك قټلها ايه حتى سمعت صوت من ورانا قلي وانا معاكم درت شفت فيه ياويلي وحد الزل بيض وعينيه كحل مشفرين شواربو مرسومين شويا لحية اول مرة ندقق في تفاصيل شخص حتى غمزلي قلي واش بيك درت وجهي رجع حمر طوماطيش قعد قلبي يخبط حده...
قاټلو ندى قولي واش اسمك باه نكتبوك معانا قالها هيثم قلت في قلبي زيد كمل على جدي هو زين واسمو اجمل منو قعد الاستاذ يشرح وهو يعلق عليه ةيضحك هو وصاحبو حتى انزعجت من تصرفاتو درت قتلو معليش تسكت شويا تخلينا نفهمو خزر فيا وقلي دوري ماتزيديش تحكي معايا درت وخليتو خفت منو...
كمل الدرس وخرج الاستاذ نص خرجو ونص قعدو واقفين قعدت نحكي وهي تسقسي فيا اسكو دايرة اقامة قټلها ايه قاټلي وين نعتلها قاټلي والله انا تاني راني تم قاټلي نقدرو نتلقاو هاكدا مليحة حسيت بفرحة قعدت نضحك وانا عندي كي نضحك غمازات دورت راسي شفت هيثم واقف ويخزرلي شفت فيه ومن بعد دورت وجهي نتفادى في نضراتو حتى شفتو جاي قريب بلت في سروالي وقف عدنا وقلنا معليش تمدولي الفيس باه نحكيو ونقدرو نخدمو مع بعض مدتلو ندى وانا حطيت راسي قلي ونتي واش اسمك قتلو زهيرة قلي الفيس قتلو ماعنديش قعد يضحك قلي علاش عايشة فالعصر الجاهلي قاټلو نور كاين لي ماتحبش تفتح فيس ولا نتوما لي ماتحلبكمش تقولو عليها جاهلة ومش متعلمة حسيت انو نور فهمتني صح....
يتبع
