رواية بنت الدوار الحلقة الأولى 1 حصريه وجديده
رواية بنت_الدوار الحلقة الأولى 1 حصريه وجديده
ناس بكري يقولو لي مكتوب على الجبين مايمحوه اليدين
وانا مكتوبي مخبيلي بزاف صوالح ولا عمري حلمت بيها في حياتي لخاطر الواقع المر لي عيشاته انا فرض عليا بلي مانحلمش احلام اكبر من واقعي دوك نعرفكم بروحي اسمي زهيرة عمري 27سنة جمالي عادي ماني شابة ماني بشعة لحم ضياف ماينتكل ماينعاف كيما يقولو بشرتي حنطية شعري فريزي في وجهي كلو عندي عينيا شابين الناس تقول ماشي نشكر في روحي جايا جابونية وعسليين يقولو عيون القطة نيفي كبير وهاد مضيعلي الفيزاج وفمي صغير نحكو على لطاي نوزن 47كيلو وطولي 163متر من عائلة فقيرة كي نقول فقيرة ادنى متطلبات الحياة ماعدناش...
عايلتي متكونة من بويا وما وزوج خوتاتي بنات واخ واحد متزوج وعندو طفل وطفلة ياسين وفاطمة الزهراء خوتاتي تاني متزوجين الكبيرة رقية عندها بنت في عمرها 15دعاء وبنتها تانية ريتاج في عمرها 10سنين واختي التانية فتيحة عندها ولد 7سنين وزوج بنات 5وصال وسمية 2سنوات انا اصغر اخوتي وانا الوحيدة لي كملت قرايتي بحكم عنا البنت ماتقراش تتعلم تحل مخها وخلاص هادي ختي فتيحة وصلت تارمينال وحبسوها بالرغم من انو جابت الباك بمعدل 15وكانت تقرا الله يبارك ومدولها طب وماخلهاش خويا تقرا حبسوها وزوجوها انا معلباليش كيفاش خلوني نقرا بالرغم من اني كنت عادي مانحبش القراية بصح كي نشوف للوضع لي حنا عايشيين فيه نقول نقرا على الاقل نخرج روحي مالذل لي عايشينو بويا مسكين ماعندهش نشوفو في عمرو 58سنة وهو يخدم مع والو فالبطاطا فالبني لي جات يخدمها مسكين وحتى خويا خرج مايقراش ورجع خدام عند الناس تحرث عليه مش قادر حتى على عايلتو لانو مرتو مراة مفسدة وماتصتحفضش على راجلها دارنا متكونة من 2شنابر وصالة وكوزينة هادي الحاجة الوحيدة لي رزقنا على راسنا ما باعت ذهبها وبنات ومعى تعب بويا والحمد الله عايشين برحمة ربي نعيش في دوار ادنى متطلبات الحياة مافيهش لا طريق لا سبيطار لا حوانيت لا خرجة لادخلة...
المهم بدات قرايتي فالجامعة رحت نقرا
للمدينة درت اقامة وانا عمري مازرت هديك المدينة اول نهار ليا رحت نسجل رحت مع بويا قاعدة نشوف فالناس كيفاش لابسين والمكياج والتحطاط ولي كوبل حشمت في بلاصتهم يقصرو مع لولاد عادي سجلت ورجعت ماعجبتنيش هديك المعيشة الغدوة نضت بكري قلت لبابا لازم نسجل في لاسيتي باه ندي شمبرة قلي صاي انا رحت معاك وريتلك الطريق ودوك حك قنطت رحت لبست ساجدة كيما كنا نقولو بالسروال
